ازاى تطفشى عريس متقدملك وانتى مش عاوزاه

في عريس متقدملك
ومش عاوزاه ولا حباه
يعنى عريس صالونات
أهلك اتفقوا معاكى انك تروحى فرح بنت عمة خالة جدة باباه عشان تقابليه هناك ورفضتي وبرضوه مصممين انك توافقي بيه وتشوفيه.. دى فرصتك بقي تكرهيه فيكى من البداية وييجى الرفض منه ..
روحى الفرح.. هزرى واضحكى مع كل الناس.. وارقصى فى وسط الفرح شدى المايك من المغنى وهو بيغنى أغنية شبرا وبنات شبرا.. سبتية والحلمية .. حاسب ياعم ومع الاداء طبعا أكيد هيصرف نظر عن الموضوع
.. ده غير انه كرهك واستحملى بقي ان أهلك كمان هايتبروا منك
.. وخلى أسلوبك فى الحديث معاه كأنك شغالة فى موقف.. ازيك يامعلم ايه الاخبار يا مان .. وافتكرى تلبسي لبس ولادى فانكى بعد التركيبة دي واللبس والكلام أكيد هايطفش
لكن لو كان أهبل وعجبه كل تصرفاتك وجه اتصل بيكي في مره في التليفون قوليلو لو سمحت ماتتكلمش تاني في التليفون انت ماتعرفش انه حرام...
وبعد كده فى أول فرصة للكلام معاه قولى له أنا أبشع حد ممكن تقابله فى حياتك أنا مش بعرف أعمل أى حاجة في البيت وكمان أنا كئيبة ومتشائمة وبيجيلي كوابيس بليل وممكن اقوم فجأه اخنق اي حد
ولاحظى انطباعة
ولو لاحظتى انه اتمسك بيكى أكثر ننتقل للخطة الثانية
اطلبى أغلى أكل وكمان بكميات كبيرة بده هايعرف انك مسرفة كمان مفجوعة ربنا يستر بقي ومايطلعش كريم زياده عن اللزوم

ولو الحكاية دى برضوه ماجبتش نتيجة ننتقل للخطة التالته وهى ركزى نظرك مع أى ولد معدي من جمبكو وقولى باعجاب أوف.. أوف.. ياه الولد ده يجنن ياعينى على حظنا الهباب.
وبكده مبروك طفشتيه وربنا يستر بقي لاتعنسي